SALUBRE MENÚ

Mastigar ben o presente

e todas as súas posibilidades,

esmagando a cada instante,

triturando a cada rato,

saboreando cada feito,

esmiuzando os agora

para evitar a indixestión,

dixerir cada suceso

coas encimas da lóxica,

da cautela e do bo senso

para non sufrir a ardentía

pola acidez da desesperanza.

Transformar en nutrientes

as vivencias miudiñas,

esas boas vitaminas

que achega o benestar,

gran pedra filosofal

da inmunodeficiencia,

absorber as calidades

de cada un dos momentos,

vívidas proteínas saudábeis

que enchen de boa enerxía

cada célula corporal.

Evitar a prexudicial graxa

do daniño desacougo

e o exceso de azucre

da nociva incomodidade,

evitar a inxestión

do malsán abatemento,

da lesiva melancolía,

da preguiza, da apatía,

do pensamento desalentador,

deglutir sen gula

os ricos folgos animosos,

a sabedeira coraxe,

a rica animosidade,

a apetitosa ousadía,

vigorosa carta do día

fornecedora axeitada,

enerxía tonificante

para a boa saúde do tino

e do latexar do corazón.

Páxina 56